The Deepfake Nudes Crisis in Schools Is Much Worse — ინსაითი

WIRED-ის უსაფრთხოების ჟურნალისტმა, მეთ ბერჯესმა, Indicator-ის მკვლევრებთან ერთად გამოაქვეყნა ახალი ანგარიში სკოლებში ხელოვნური ინტელექტის ინსტრუმენტებით შექმნილი ფეიკ-ფოტოების მასშტაბური გავრცელების შესახებ.

ოფიციალური მონაცემების მიხედვით, 2023 წლიდან დღემდე 28 ქვეყნის 88 სკოლაში დაფიქსირდა მსგავსი ინციდენტი. გლობალურად, 640-ზე მეტი არასრულწლოვანი მოსწავლე გახდა სექსუალური ძალადობის მსხვერპლი. მოზარდები იწერენ თანაკლასელების ფოტოებს Instagram-იდან და Snapchat-იდან, რის შემდეგაც იყენებენ ხელმისაწვდომ AI აპლიკაციებს შიშველი ფოტოების დასაგენერირებლად. ჩრდილოეთ ამერიკაში დაფიქსირდა 30-მდე შემთხვევა, მათ შორის ერთ-ერთ სკოლაში 60-ზე მეტი მოსწავლე დაზარალდა. ევროპაში 20-ზე მეტი ინციდენტი გამოვლინდა, სამხრეთ ამერიკაში 10, ხოლო ავსტრალიასა და აზიაში ჯამში 12 შემთხვევა.

პრობლემის ესკალაცია ბოლო ორი წლის განმავლობაში მოხდა, რადგან გენერაციული მოდელები უფრო მარტივად გამოსაყენებელი გახდა. შვეიცარიაში 12-დან 14 წლამდე მოსწავლეებმა დააგენერირეს ფოტოები, ავსტრიასა და ბრაზილიაში მსგავსი ქმედებებისთვის მოსწავლეები სკოლიდან გარიცხეს, ხოლო აშშ-ის ფრემონტის ოლქში პოლიციამ სამი მოზარდი დააკავა. ამავდროულად, მსგავსი მავნე აპლიკაციების შემქმნელები ყოველწლიურად მილიონობით დოლარს გამოიმუშავებენ.

კანონმდებლობით, არასრულწლოვნების მონაწილეობით შექმნილი მსგავსი მასალა კლასიფიცირდება როგორც ბავშვთა სექსუალური ძალადობის მასალა (CSAM). ფაქტები აჩვენებს, რომ ტექნოლოგიის განვითარების ტემპი უსწრებს რეგულაციებს და საგანმანათლებლო დაწესებულებები მოუმზადებლები არიან მზარდი ციფრული საფრთხეების აღსაკვეთად.