🏢 Standard Chartered-მა AI-ით 8 000 პოზიციის ჩანაცვლება დააანონსა ბრიტანული საერთაშორისო ბანკის, Standard Chartered-ის CEO-მ, ბილ უინტერსმა, ოთხშაბათს თანამშრომლებს შიდა წერილი გაუგზავნა და საკუთარი ფრაზა განმარტა. მანამდე, ჰონგ-კონგში გამართულ პრეზენტაციაზე ხელმძღვანელმა განაცხადა, რომ კომპანია „დაბალი ღირებულების ადამიანურ კაპიტალს“ ხელოვნური ინტელექტით ჩაანაცვლებს. ახალი ფინანსური სტრატეგიის მიხედვით, ლონდონში დაფუძნებული Standard Chartered-ი 2030 წლისთვის სამუშაო ძალის 15%-ს, ანუ დაახლოებით 8 000 სამუშაო ადგილს სრულად გააუქმებს. უინტერსმა ინვესტორებთან აღნიშნა, რომ ეს უბრალოდ ხარჯების დაზოგვა არ არის და ბანკი ადამიანურ რესურსს ფინანსური და საინვესტიციო კაპიტალით ცვლის. Wall Street Journal-ის ცნობით, ტერმინმა „დაბალი ღირებულების ადამიანური კაპიტალი“ ინტერნეტსივრცეში მკვეთრი უკმაყოფილება გამოიწვია. Financial Times-ის ბლოგმა ფრაზა გააშარჟა და ირონიული პროდუქციაც გამოუშვა, ხოლო სინგაპურის ყოფილმა პრეზიდენტმა, ჰალიმა იაკობმა, საკუთარ Facebook გვერდზე დაწერა, რომ თანამშრომლების მსგავსი ტერმინით მოხსენიება შემაშფოთებელი ფაქტია. მწვავე პროტესტის შემდეგ უინტერსმა თანამშრომლებს სპეციალური მემო მისწერა და დააკონკრეტა, რომ პოზიციების გაუქმება თავად სამუშაო პროცესის ცვლილებას ასახავს და არა ადამიანების რეალურ ღირებულებას. მსგავსი ტენდენცია სხვა საფინანსო ინსტიტუტებშიც ფიქსირდება - ცოტა ხნის წინ კიდევ ერთმა მსხვილმა ბრიტანულმა ბანკმა, HSBC-მ, ტექნოლოგიების დანერგვის გამო 20 000-მდე პოზიციის შესაძლო შემცირებაზე ისაუბრა. ბაზარზე მიმდინარე პროცესები აჩვენებს, რომ კორპორაციული სექტორი მასშტაბური ავტომატიზაციის ახალ ეტაპზე გადავიდა, სადაც ტრადიციულ ადმინისტრაციულ როლებს ალგორითმები იკავებენ.