📊 KCL-მა კვლევა წარადგინა - სტუდენტების 34% AI-ის გამო არეულობას ელის King's College London-ის (KCL) პოლიტიკის ინსტიტუტმა ორშაბათს ახალი კვლევა გამოაქვეყნა, რომელიც საზოგადოების სხვადასხვა ჯგუფის განწყობებს ზომავს. გამოკითხვის მიხედვით, უნივერსიტეტის სტუდენტების 34% მიიჩნევს, რომ ხელოვნური ინტელექტი სამუშაო ადგილებს იმდენად სწრაფად გააქრობს, რომ ეს სამოქალაქო არეულობას გამოიწვევს. კვლევამ 1 000 სტუდენტი, 1 000 ახალგაზრდა, 500 დამსაქმებელი და 2 000 მოქალაქე მოიცვა. მონაცემები აჩვენებს, რომ სტუდენტები AI-ის ყველაზე აქტიური მომხმარებლები არიან - 77% სისტემებს თვეში რამდენჯერმე იყენებს, 27% კი - ყოველდღიურად. შედარებისთვის, ფართო საზოგადოებაში არეულობას გამოკითხულთა მხოლოდ 22% ელის. მიუხედავად ხშირი გამოყენებისა, სტუდენტების ნახევარზე მეტი დარწმუნებულია, რომ სამუშაო ადგილების შემცირება ჩვეულებრივ ეკონომიკურ რეცესიაზე ბევრად უარესი იქნება. დამატებით, სტუდენტების 90% აცხადებს, რომ მოდელებთან მუშაობისას შეცდომებს წააწყდნენ - ძირითადად ფაქტობრივ უზუსტობებსა (37%) და გამოგონილ წყაროებს (31%), თუმცა მხოლოდ ნახევარი ამოწმებს მიღებულ ინფორმაციას. კვლევამ ასევე აჩვენა, რომ ფართო საზოგადოების 48%-ს საერთოდ ხელოვნური ინტელექტის არიდება ურჩევნია. KCL-ის პოლიტიკის ინსტიტუტის დირექტორმა, ბობი დაფიმ, განაცხადა, რომ სტუდენტები და ახალგაზრდები ტექნოლოგიის განვითარებას შიშით უყურებენ, რადგან ავტომატიზაცია პირდაპირ საფრთხეს უქმნის საწყისი დონის სამუშაო პოზიციებს. პრობლემას ამწვავებს ის ფაქტიც, რომ სტუდენტების მხოლოდ 36% მიიჩნევს, რომ უნივერსიტეტი მათ ხელოვნური ინტელექტით შეცვლილი შრომითი ბაზრისთვის რეალურად ამზადებს.