Usually, Young People Embrace New Technology. Gen — ინსაითი

ორგანიზაცია Gallup-მა, საინვესტიციო ფონდმა GSV Ventures-მა და Walton Family Foundation-მა 15 აპრილს ერთობლივი კვლევა წარადგინეს, რომელიც ხელოვნური ინტელექტის მიმართ Z თაობის დამოკიდებულებას დეტალურად აღწერს.

მონაცემების მიხედვით, გამოკითხულთა 48% აცხადებს, რომ სამუშაო სივრცეში AI-ის რისკები მის სარგებელს აღემატება, ხოლო 80%-ის თქმით, მისი როგორც დამხმარე საშუალების გამოყენება სწავლის პროცესს ართულებს. კვლევის ავტორების განცხადებით, აღნიშნული სკეპტიციზმი ძირითადი კოგნიტური და პროფესიული უნარების დაკარგვის შიშიდან მომდინარეობს. წინა წლის ანალოგიურ მონაცემებთან შედარებით, ახალგაზრდებში ხელოვნური ინტელექტის მიმართ ენთუზიაზმი 14%-ით დაეცა, ხოლო პოზიტიური მოლოდინები 9%-ით შემცირდა. ამავე პერიოდში, ტექნოლოგიის მიმართ აგრესიულად განწყობილი ახალგაზრდების მაჩვენებელი 22%-დან 31%-მდე გაიზარდა. სხვა გამოკითხვის მონაცემებით, Z თაობის დასაქმებულთა 44% სამსახურში კორპორატიული AI სისტემების დანერგვას მიზანმიმართულად უშლის ხელს, რადგან სამუშაო ადგილების დაკარგვის ეშინიათ. ტენდენციის უკიდურესი გამოვლინება დაფიქსირდა ცოტა ხნის წინ, როდესაც 20 წლის ტეხასელმა ახალგაზრდამ OpenAI-ის CEO-ს, სემ ოლტმენის საცხოვრებელ სახლს მოლოტოვის კოქტეილი ესროლა და მოტივად კაცობრიობისთვის AI-ისგან მომდინარე რისკები დაასახელა.

Z თაობაში მზარდი სკეპტიციზმი და ღია წინააღმდეგობა ტექნოლოგიურ ინდუსტრიას მომხმარებელთა სტანდარტულად ყველაზე აქტიური სეგმენტის ათვისებაში ხელს უშლის. ეს ფაქტორი პირდაპირ გავლენას ახდენს საგანმანათლებლო და კორპორატიულ ბაზრებზე AI პროდუქტების დანერგვის სისწრაფესა და კომპანიების სამომავლო შემოსავლების ზრდაზე.