⚖️ OpenAI-მ ილონ მასკს სასამართლო მოუგო - $134 მილიარდიანი დავა დასრულდა ოკლენდის ფედერალურმა სასამართლომ ორშაბათს დაადგინა, რომ OpenAI-ის CEO, სემ ოლტმენი და კომპანიის პრეზიდენტი, გრეგ ბროკმანი xAI-ის დამფუძნებლის, ილონ მასკის წინაშე დამნაშავეები არ არიან. მასკი სასამართლოში ითხოვდა $134 მილიარდის გადანაწილებას OpenAI-ის კომერციული შტოდან არაკომერციულში და ოლტმენს საქველმოქმედო ორგანიზაციის მითვისებასა და თავდაპირველი კონტრაქტის დარღვევაში ადანაშაულებდა. ორსაათიანი მსჯელობის შემდეგ, ნაფიცმა მსაჯულებმა და მოსამართლე ივონ გონსალეს როჯერსმა სარჩელი ხანდაზმულობის ვადის გასვლის გამო გააუქმეს. OpenAI-ის იურისტების მტკიცებით, მასკმა კომერციულ სტრუქტურაზე გადასვლის გეგმების შესახებ ჯერ კიდევ 2017 წელს იცოდა. პროცესის ფარგლებში ჩვენება მისცა Microsoft-ის CEO-მ, სატია ნადელამაც. სასამართლომ Microsoft-იც, რომელსაც მასკი ოლტმენის ხელშეწყობაში ადანაშაულებდა, უდანაშაულოდ ცნო. OpenAI-ის მთავარმა იურისტმა, უილიამ სავიტმა განაცხადა, რომ მასკის სარჩელი კონკურენტის საბოტაჟის მცდელობა იყო. თავად ილონ მასკმა სოციალურ ქსელში დაწერა, რომ მოსამართლეს საქმის არსზე არ უმსჯელია და გადაწყვეტილება მხოლოდ ვადებთან დაკავშირებულ ტექნიკურ დეტალს დაეფუძნა. ეს გადაწყვეტილება ხსნის მთავარ იურიდიულ ბარიერს და OpenAI-ის საშუალებას აძლევს, მიმდინარე წლის ბოლოს საჯარო კომპანია გახდეს და $1 ტრილიონის შეფასებას მიაღწიოს, თუმცა მასკი განაჩენის გასაჩივრებას გეგმავს.