⚠️ კიბერსარდლობამ AI მოდელების დასანერგად 2 უწყების საერთო ჯგუფი შექმნა აშშ-ის ეროვნული უსაფრთხოების სააგენტოსა (NSA) და კიბერსარდლობის ხელმძღვანელმა, გენერალმა ჯოშუა რადმა, პენტაგონის უმაღლესი კლასიფიკაციის მქონე საიდუმლო ქსელებში ხელოვნური ინტელექტის მოდელების დასანერგად სპეციალური სამუშაო ჯგუფი წარადგინა. ინიციატივის შესახებ გენერალმა თანამშრომლებს შიდა მიმოწერის საშუალებით 2 კვირის წინ აცნობა. პროცესის დაჩქარების მთავარი მიზეზი აპრილში გამოსული Anthropic-ის ახალი მოდელი, Claude Mythos-ია, რომელიც ციფრულ სისტემებში უსაფრთხოების ხარვეზებს ადამიან ჰაკერებზე სწრაფად პოულობს. ეროვნული უსაფრთხოების რისკების გამო მოდელზე წვდომა შეზღუდულია, თუმცა Anthropic-ის შეფასებით, მსგავსი ინსტრუმენტები მომდევნო 6-დან 24 თვეში ფართოდ ხელმისაწვდომი გახდება. ახალი ერთობლივი სამუშაო ჯგუფი შეაფასებს, თუ როგორ შეიძლება სილიკონის ველის კომპანიების, მათ შორის OpenAI-ისა და Google-ის ტექნოლოგიების უსაფრთხოდ ინტეგრირება უმაღლესი დაშვების სამხედრო ქსელებში. პროექტს კიბერსარდლობის ოფიცერი უხელმძღვანელებს, ხოლო ტექნიკურ ექსპერტიზას უშუალოდ NSA-ის ხელოვნური ინტელექტის უსაფრთხოების ცენტრი უზრუნველყოფს. კიბერსარდლობის ყოფილი მოადგილის, გენერალ-ლეიტენანტ ჩარლზ მურის განცხადებით, სამხედრო სისტემებში AI ინსტრუმენტების დანერგვა უკვე კრიტიკული აუცილებლობაა. ახალი ტექნოლოგია უმნიშვნელოვანესი ხდება როგორც თავდაცვით, ისე შეტევით კიბეროპერაციებში საფრთხეების სწრაფი აღმოჩენის, მოწყვლადობების პრიორიტეტიზაციისა და გადაწყვეტილებების დროულად მისაღებად.