⚠️ Mercor-ის ჰაკერულ თავდასხმას 5 ახალი სასამართლო სარჩელი მოჰყვა სან-ფრანცისკოში დაფუძნებულმა ხელოვნური ინტელექტის კომპანიამ, Mercor-მა, რომელიც მოდელების დასატრენინგებლად დამოუკიდებელ კონტრაქტორებს ქირაობს, მასშტაბური ჰაკერული თავდასხმა დაადასტურა. ინციდენტის გასაჯაროების შემდეგ, გასულ კვირას ყოფილმა და ამჟამინდელმა თანამშრომლებმა კომპანიის წინააღმდეგ 5 სასამართლო სარჩელი შეიტანეს. Mercor-ის ოფიციალური წარმომადგენლის განცხადებით, კიბერშეტევა ღია წყაროს პროექტის, LiteLLM-ის ექსპლოიტს უკავშირდება. მოპარული ბაზა მოიცავს Slack-ის მიმოწერებსა და ვიდეოებს, რომლებიც ასახავს კონტრაქტორებისა და ხელოვნური ინტელექტის მოდელების პირდაპირ ინტერაქციას. სარჩელების მიხედვით, გაჟონილია მუშახელის სენსიტიური პირადი მონაცემები, მათ შორის სოციალური დაზღვევის ნომრები და საცხოვრებელი მისამართები. ინციდენტმა სერიოზული პრობლემები შეუქმნა დამკვეთ კომპანიებსაც. შიდა გამოძიების დასრულებამდე, Meta-მ Mercor-თან ყველა სახის სამუშაო პროცესი ოფიციალურად შეაჩერა. საფრთხე ემუქრება OpenAI-ისა და Anthropic-ის დახურულ ტრენინგ-სისტემებსაც. ბოლო 7 თვის განმავლობაში Mercor-ის წინააღმდეგ უკვე 3 ჯგუფური სარჩელი იყო შეტანილი სამუშაო პირობების დარღვევისა და ანაზღაურების შემცირების გამო. მსგავსი შემთხვევები ნათლად აჩვენებს მესამე მხარის კონტრაქტორებზე დამოკიდებული ხელოვნური ინტელექტის მიწოდების ჯაჭვის მოწყვლადობას. მსხვილი ტექნოლოგიური კომპანიებისთვის მთავარ საფრთხეს ხელოვნური ინტელექტის მოდელების დატრენინგების კონკრეტული მეთოდოლოგიების გასაჯაროება წარმოადგენს, რაც პირდაპირ უკავშირდება ბაზარზე კონკურენტული უპირატესობის შენარჩუნებას.