⚖️ აშშ-ის სასამართლომ Claude-ის 31 დოკუმენტი გასაჯაროებად ცნო აპრილში ნიუ-იორკის ფედერალურმა მოსამართლემ, ჯედ რაკოფმა, დაადგინა, რომ ხელოვნური ინტელექტის ჩატბოტებთან მიმოწერა ადვოკატისა და კლიენტის კონფიდენციალურობის პრივილეგიით არ სარგებლობს. ახალი სამართლებრივი პრეცედენტი ფინანსური კომპანია GWG Holdings-ის ყოფილი თავმჯდომარის, ბრედ ჰეპნერის საქმეს უკავშირდება. სასამართლო დავის მოსამზადებლად, ჰეპნერმა საკუთარ ადვოკატებთან გაგზავნამდე შიდა ფინანსური ანგარიშები Anthropic-ის მოდელში, Claude-ში შეიყვანა დასამუშავებლად. ფასიანი ქაღალდებისა და ელექტრონული თაღლითობის საქმეზე დაცვის მხარე სწორედ ჩატბოტის მიერ გენერირებულ წინასწარ რეპორტებს იყენებდა. მოსამართლის განჩინებით, ვინაიდან მომხმარებელსა და AI პლატფორმას შორის იურიდიული ურთიერთობა არ არსებობს, მესამე მხარისთვის ინფორმაციის გაზიარება კონფიდენციალურობას ავტომატურად არღვევს. განჩინებაში მოსამართლემ თავად ჩატბოტი პასუხისმგებლობისგან გაათავისუფლა, რადგან Claude-ის სისტემა პირდაპირ აფრთხილებს მომხმარებელს, რომ მოდელი არ არის ადვოკატი. შედეგად, ბრალდებულს დაევალა 31 დოკუმენტი პირდაპირ სასამართლოსთვის გადაეცა. ეს გადაწყვეტილება იურიდიული ფირმების სამუშაო პოლიტიკას უკვე ცვლის და მონაცემების დამუშავების ახალ სტანდარტს აწესებს. მაგალითად, იურიდიულმა კომპანია Sher Tremonte-მ განაახლა კონტრაქტები და კლიენტებს ოფიციალურად აფრთხილებს, რომ მესამე მხარის AI პლატფორმებზე, როგორიცაა ChatGPT ან Claude, ნებისმიერი დეტალის შეყვანა მათ სამართლებრივ დაცვას დაუყოვნებლივ აუქმებს.