📊 ChatGPT-ის ბაზრის წილი 56%-მდე დაეცა - Claude-ის ტრაფიკი გასამმაგდა ანალიტიკური კომპანია Similarweb-ის ბოლო მონაცემებით, გენერაციული ხელოვნური ინტელექტის ბაზარზე ChatGPT-ის ვებ-ტრაფიკის წილი მცირდება, ხოლო კონკურენტების, განსაკუთრებით კი Claude-ისა და Google Gemini-ს მაჩვენებლები იზრდება. გასულ თვეში Anthropic-ის Claude-ის ტრაფიკის წილი 2.2%-დან 6.02%-მდე გაიზარდა და მან ერთდროულად Deepseek-სა (3.74%) და Grok-ს (3.44%) გადაუსწრო. ბაზრის ლიდერი კვლავ OpenAI-ის პროდუქტია 56.72%-ით, თუმცა წინა წლის 77.43%-იანი ნიშნულიდან ეს მკვეთრი ვარდნაა. ყველაზე დიდი ზრდა Google Gemini-მ აჩვენა, რომლის ტრაფიკის წილიც 6%-დან 25.46%-მდე ავიდა. Similarweb-ის რეპორტის მიხედვით, სხვა მოთამაშეების მაჩვენებლები ასეთია: Microsoft Copilot-მა 1.99% დაიკავა (რაც უკვე მოიცავს Microsoft 365 Chat-ის მონაცემებს), ხოლო Perplexity-მ - 1.64%. მიუხედავად ახალი მოდელების სწრაფი ზრდისა, აბსოლუტურ ციფრებში სხვაობა მაინც დიდია. OpenAI-ის CEO-მ, სემ ოლტმენმა, განაცხადა, რომ ChatGPT-ის მხოლოდ ტეხასის შტატში იმდენივე მომხმარებელი ჰყავს, რამდენიც Claude-ს მთელ აშშ-ში. ბაზრის ეს გადანაწილება აჩვენებს, რომ მომხმარებლები სულ უფრო მეტად იყენებენ ალტერნატიულ მოდელებს, ხოლო Google-ის აგრესიული ინტეგრაცია Android-ის ეკოსისტემაში Gemini-ს პოზიციებს მნიშვნელოვნად აძლიერებს და პირდაპირ ტრაფიკს უზრუნველყოფს.